Confebaskek LHko 70 gaztek atzerriko enpresetan praktikak egitea ahalbidetuko du Erasmus+ bekekin

Confebask Erasmus+

Euskadiko LHko ikasleak, aurki Confebaskek kudeatutako Erasmus+ bekekin abiatuko direnak (argazkia, Confebask)

2025-01-29

Confebaskeko Prestakuntza, Talentu eta Enplegu sailak 70 gazte elkartu ditu Bilbon, Euskadiko LHko 25 ikastetxe publiko zein itunpekoetakoak, zeinek datozen asteetan euren lehen praktikak egingo baitituzte atzerriko enpresetan, Erasmus + beken eskutik; Europako programa hori EBk, SEPIEren bidez, Eusko Jaurlaritzak eta Bizkaiko Diputazioak finantzatzen dute, eta Confebaskek kudeatzen du orain dela 25 urte baino gehiagotik.

Euskal Enpresarien Konfederazioa da proiektuaren liderra, eta ikasleen LHko ikastetxeekin jartzen da harremanetan eta praktikak egiteko enpresetako egonaldiak prestatzen ditu. Aurten, hautatutako konpainiak Irlandan, Italian, Portugalen, Frantzian eta Maltan daude, eta 13 asteko prestakuntza praktikoa egingo dute martxotik ekainera.

Nazioarteko Mugikortasuneko arduradun Arantza Vigiolak aurkeztu dizkiete hautatutako ikasleei programaren ildo nagusiak, baita atzerrian dauden bitartean jarraitu beharreko jarraibideak eta harrera egingo dieten enpresen ezaugarriak ere.

Lanbide Heziketako 70 ikasleetatik, 38 Goi Mailako zikloetakoak dira, eta gainerako 32ak Erdi Mailako zikloetakoak.

Prestigioa

Arantza Vigiolak Bilboko Bizkaia Aretoan elkartu diren ikasleei gogorarazi dienez, “euskal LHa Europan prestigio handia duen prestakuntza bat da”, eta animatu egin ditu “aukera horretaz baliatzera”, eta bai beren “gaitasunagatik” bai “jarreragatik” nabarmentzera, izan ere, bi ezaugarri horiek, gogoratu duenez, “kontratatzeko garaian enpresek baloratzen dituzten lehentasun nagusietakoak dira”.

Halaber, gogorarazi die “Euskadiren enbaxadore” bihurtuko direla herrialde ezberdinetan egiten dituzten egonaldietan, eta “motxilak beteta itzultzeko” eskatu die, “Euskadiko enpresak zain baitituzte, eta beren talentu guztiaren beharra baitute”.

 

Helburu estrategikoa

Nazioarteko prestakuntza praktikoa helburu estrategikoa da Confebaskentzat. Izan ere, ikasle gazteei zuzendutako Erasmus + nazioarteko beken programak euskal enpresek eskatzen dituzten 4 baldintza nagusiak betetzen ditu berez: jarrera, esperientzia, prestakuntza eta hizkuntzak.

Izan ere, Confebasken, Eusko Jaurlaritzaren eta Ikastetxeen arteko 30 urte baino gehiagoko lankidetzari esker, Euskadi erkidego autonomoen rankingaren buruan kokatzen da nazioarteko mugikortasunari dagokionez, ikasle kopuruagatik eta proiektu kopuruagatik, eta, are gehiago, Europako Batzordeak berak ezarritako ikasleen mugikortasunaren %10eko helburua gainditzen du.

(CONFEBASK ERASMUS+ BEKAK HEMEN)

 

----------------------------

CONFEBASK-i BURUZ

1983an lurraldeetako erakunde kideek sortua – Adegi (Gipuzkoa), Cebek (Bizkaia) eta SEA Empresas Alavesas (Araba) –, Confebask Euskadiko sektore arteko Enpresa Erakunde adierazgarriena da, tamaina eta sektore guztietako enpresak dituelako, eta, beraz, instituzio autonomiko, erakunde sindikal, komunikabide eta, oro har, euskal gizartearen aurrean enpresen erreferentziazko solaskidea da. Euskal enpresek Euskadiko soldatapeko 10 langiletik 8 ingururi ematen diete lana eta euskal ekonomiak sortutako aberastasunaren ia %85 sortzen laguntzen dute.