- ESMren osoko bilkura, Confebaskeko lehendakariaren eta Adegiko, Cebekeko eta Seako zuzendari eta idazkari nagusien partaidetzarekin
Isabel Busto, Confebaskeko lehendakaria (argazkia Irekia)
2023-04-19
Elkarrizketa Sozialerako Mahaiak – Confebask, Eusko Jaurlaritza eta erakunde sindikalak biltzen ditu – osoko bilkura egin du gaur goizean, aurreikusitako lan plana eta datozen ekitaldietan lehentasuna izango duten gaiak ofizialki adosteko. Hitz egiteko txandan, Isabel Busto Confebaskeko lehendakariak positibo baloratu ditu lortutako akordioak.
“Lehenik eta behin, azpimarratu nahi nuke Lantalde berri bat eratu dela, Erronka Demografikoa lantzeko. Aspaldi ohartarazten ari gara Euskadiko enpresek zailtasun larriak eta gero eta handiagoak dituztela beharrezko profil profesionala duten behar besteko pertsonak aurkitzeko. Herrialdeko estrategia bat behar dugu, denok, erakundeek, enpresek, unibertsitateek eta, oro har, hezkuntza sistemak diseinatua, arazoaren ikuspegi bateratuarekin eta zeharkakoarekin, aurrean dugun erronka izugarriari aurre egin ahal izateko. Zalantzarik gabe, ESMren barruan talde berri hau eratzeak erronka demografikoari eta estrategia bateratu posibleei buruzko hausnarketa bateratua egiten lagunduko du”.
“Bigarrenik – jarraitu du Isabel Bustok –, halaber, gauza positibotzat jotzen dugu hezkuntza arloan orientazioari buruzko oinarrizko Akordio bat bilatzeko lan egitea. Horrela, hezkuntza sistemak eta etorkizunean sektore publikoak eta pribatuak enpleguari dagokionez izango dituzten premiekin hobeto bat egitea lortuko dugu”.
Horrez gain, Confebaskeko lehendakariak garrantzitsutzat jo du Aldi Baterako Ezintasunari buruzko Talde Teknikoak egindako lanekin jarraitzea, eta haren lana eskertu nahi izan du, zera azpimarratuz: “lanerako dagoen zorroztasunari eta inplikazioari esker, datu eta informazio berriak lortzen ari dira, Aldi Baterako Ezintasunagatik etengabe sortzen den absentismoaren arazo larrirako irtenbide posibleak aztertzeko. Zentzu horretan – azpimarratu du Isabel Bustok –, garrantzitsua iruditzen zait azpimarratzea kontua ez dela errudunak bilatzea, irtenbideak baizik”.
Eta, azkenik, Confebaskeko lehendakariak ESMk etorkizuneko Zainketen aldeko Herrialde itun batekin duen konpromisoa azpimarratu du. Gai horrek, Isabel Bustok azpimarratu duenez, ESMko parte hartzaileengandik “konpromiso bateratu bat lortu du, arlo soziolaboraletik zainketen inguruan herrialde itun bat eraikitzeko funtsezkotzat jotzen ditugun elementu eta oinarriei buruzkoa, eta horien artean azpimarratu nahi nituzke erantzukidetasunaren aldeko apustua, emakumeen talentuaren zati handi bat alferrik galtzen ez jarraitzeko funtsezko elementu gisa (ezin dugu horrelakorik onartu); eta begirada positibo bat, sektore hori enplegu eta hazkunde ekonomikorako nitxo potentzial gisa baloratuz eta hori indartzearen alde eginez”.
“Finean – amaitu du Confebaskeko lehendakariak –, gaur aurkezten dizuegun ESMko akordioen gure balorazioa da konprometituta jarraitzen dugula Euskadiko Elkarrizketa Sozialaren bultzada irmoarekin, neurri zehatzekin eta lan plan anbiziotsu batekin".
