Confebaskek legegintzaldi honetarako enpresa agenda aurkeztu dio Imanol Pradales lehendakariari

2024-07-24

Imanol Pradales lehendakariak Confebaskeko Tamara Yague hartu du gaur goizean, duela gutxi Eusko Jaurlaritzako buru izendatu ondoren egindako lehen bilera instituzionalean.

Komunikabideen aurrean ondoren egindako agerraldian Tamara Yaguek nabarmendu duenez, “gure lankidetza eta leialtasun instituzionala eskaini diogu lehendakariari, euskal enpresen lehiakortasuna mantendu eta, horrekin batera, gure ongizate estatua mantentzen lagunduko duten politika mota guztiak bultzatzeko, enplegua sortuz, zergak ordainduz, etab.  Lehendakariak aliatu bat izango du gugan, inoiz ez oztopo bat. Uste dugu horixe dela Herrialdeak eragile sozialei eskatzen diguna”.

Halaber, Confebaskeko presidenteak lehendakariari nabarmendu dio beharrezkoa dela “euskal enpresek eta enpresaburuek Euskadiren aurrerabide eta ongizate sozialari egiten dioten ekarpenaren balioa gizartean eta maila politikoan nabarmentzea. Era berean, garrantzitsua da langile faltari erantzutea, euskal enpresen enplegu eta kualifikazio beharrak asetzeko. Eta, gainera, eskualdearen lehiakortasuna indartzea eta hazkunde ekonomikoa bizkortzea proposatzen dugu. Horretarako, industriaren aldeko apustua indartu eta berritzeaz harago, begirada fiskal berri bati heltzea ere planteatzen dugu”.

Bileran, halaber, Confebaskeko presidenteak azpimarratu du euskal enpresei martxan dauden eraldaketa produktiboetan laguntzeko beharra.

Azkenik, bi gairen inguruko kezka helarazi dio lehendakariari: alde batetik, Euskadiko lan giroa. “Sektore pribatuan sinatutako hitzarmenetan errekor mailan egon arren, mezu jakin batzuek ematen duten irudiak ez du inbertsioak erakartzen laguntzen. Bat gatoz akordioaren balioa nabarmentzearekin eta ez, hain zuzen ere, gatazkarena“, azpimarratu du Tamara Yaguek.

Bestalde, “gure beste kezketako bat Euskadiko absentismoa da, estatuko buruan kokatzen baita alde handiarekin, eta ez dugu ulertzen zergatik. Hain zuzen ere, horren diagnostikoan aurrera egiten saiatzeko, udazkenerako Confebask, Adegi, Cebek eta Sea erakundeen ekitaldi bateratu bat prestatzen ari garela aurreratu diogu lehendakariari”.

------------------------------------------

1983an lurraldeetako erakunde kideek sortua – Adegi (Gipuzkoa), Cebek (Bizkaia) eta SEA Empresas Alavesas (Araba) –, Confebask Euskadiko sektore arteko Enpresa Erakunde adierazgarriena da, tamaina eta sektore guztietako enpresak dituelako, eta, beraz, instituzio autonomiko, erakunde sindikal, komunikabide eta, oro har, euskal gizartearen aurrean enpresen erreferentziazko solaskidea da. Euskal enpresek Euskadiko soldatapeko 10 langiletik 8 ingururi ematen diete lana eta euskal ekonomiak sortutako aberastasunaren ia %85 sortzen laguntzen dute.