- Tamara Yagueren adierazpenak, SEA Empresas Alavesas erakundeak antolatutako ‘Liderando en incertidumbre’ jardunaldian, non Euskadin absentismo handiaren arazoa amaitzeko konpromisoa ere eskatu duen.
Argazkia SEA Empresas Alavesas
2025-12-05
Tamara Yague Confebaskeko presidenteak mahai inguru batean parte hartu du gaur, Angela de Miguel Cepymeko presidentearekin eta Lorenzo Amor ATA Estatuko Autonomoen kolektiboko presidente eta CEOEko presidenteordearekin batera.
Tamara Yaguek bere hitzaldian berretsi duenez, nazioarteko eta tokiko egungo egoeran “ziurgabetasun eta arrisku etengabeko jokaleku” bat aurkitzen dugun arren, “euskal enpresak erreakzionatzen jakiten ari dira”.
“Bizitzea egokitu zaigun garai honetako erronka handiei erantzuteko gaitasuna dugu. Eta, berez, euskal enpresak inbertsio gehiagorekin eta enplegu gehiagorekin erreakzionatzen ari gara... guztiok ezagutzen ditugun zailtasunak gorabehera. Arrakastarako, ordea –amaitu du Tamara Yaguek–, gizarte osoaren laguntza behar dugu.
Ildo horretan, Confebaskeko presidenteak absentismoa aipatu du berriro, hau da, gaixotasun arrunten ondoriozko bajak. "Euskadi liderra da horretan. Egiazki, ez dakigu zer gertatzen den estatuko gainerako lurralde eta baita gainerako herrialdeekin ere hain alde handia egoteko. Ezin dugu alde batera utzi hori arazo bat dela. Garrantzitsua da gizarte osoaren konpromiso kolektibo bat lantzea arazoari amaiera emateko, izan ere, funtsezko alderdi bati eragiteaz gain, hau da, pertsonen osasunari, enpresei lehiarako desabantaila handia dakarkigu”.
SEA Empresas Alavesasek antolatutako jardunaldia bere presidente Juan Antonio Sanchez Corcheroren eta CEOEko presidente Antonio Garamendiren ongietorriarekin hasi da. Beste mahai batekin jarraitu du, Confemetaleko eta Hosteleria Españako presidenteen partaidetzarekin, eta enpresen arteko goi bilera batekin amaitu da, non Aernnova, Mercedes Benz, Michelin, Iberdrola, Tubos Reunidos, Amurrio Ferrocarril eta La Rioja Alta enpresetako goi ordezkariek parte hartu duten. Ramiro Gonzalez Arabako ahaldun nagusiak itxi du jardunaldia.
-----------------------------------------
CONFEBASKI BURUZ
1983an lurraldeetako erakunde kideek sortua –Adegi (Gipuzkoa), Cebek (Bizkaia) eta SEA Empresas Alavesas (Araba)–, Confebask Euskadiko sektore arteko Enpresa Erakunde adierazgarriena da, tamaina eta sektore guztietako enpresak dituelako, eta, beraz, instituzio autonomiko, erakunde sindikal, komunikabide eta, oro har, euskal gizartearen aurrean enpresen erreferentziazko solaskidea da.
Euskal enpresak sortzen duen aberastasuna Euskadiko BPGaren %70 inguru da, lana duten pertsona guztien %70i ematen die enplegua, %85 kontratu mugagabearekin, eta estatuko batez besteko soldatarik altuenak ordaintzen dizkie, Madrilekin batera.
Gainera, ordaintzen diren zergekin, Eusko Jaurlaritzaren gastu sozialaren %94aren parekoa ordaintzen laguntzen dute urtero, 12.000 milioi euro inguru. Euskal enpresak 7.600 milioirekin laguntzen du langileen pentsioetarako eta langabezia asegururako”.
