Noticias

Confebaskek Enpresa Finantzaketari buruz argitaratzen duen Newsletterraren azken zenbakian irakurri daitekeenez, irailera arte konpainiei emandako kreditu berria %11,8 hazi da, pandemian zehar enpresak finantzatzeko beharrak asetzeko martxan jarritako likidezia lerroek bultzatuta. Hazkundea batez ere pandemiaren hasieran kontzentratu da, eta azken hilabeteetan apaldu egin da. Kredituaren prezioari dagokionez, enpresa txiki eta ertainak zein enpresa handiak kontuan hartuta, minimoetan jarraitzen du, eta Europako homonimoek bezala ordaintzen dute, nahiz eta, batez beste, urte baterako maileguetan, enpresa handiek 0,47 puntu gutxiago ordaintzen duten enpresa txiki eta ertainek baino. Eta enpresen berankortasunari dagokionez, tasa %4,9ra jaitsi da, baxuena izanik 2009tik.

Aurtengo Korta edizioan saritutakoak izan dira Jesus Maria Guibelalde enpresaria, CEO eta IMATeko fundatzailea; Jose Maria Bergareche, Diario Vascoko lehendakari eta El Correo egunkariko kontseilaria; Antton Suquia, Sukia higiezin eta sustapen taldeko fundatzailea, eta Jose Luis Larrañaga, Sarralle taldeko bazkide fundatzailea. Sariak banatzeko ekitaldian, Confebaskeko lehendakari Eduardo Zubiaurrek goraipatu egin du saritutako lau enpresarien figura, eta, adierazi duenez, “ezin hobeto gorpuzten dute Joxe Mari Korta denontzako erreferentzia izatea eragin zuten balioak: kalitate humanoa eta enpresariala, erabakimena eta ausardia, arrisku pertsonalak zein familiarenak bere gain hartzeko”. Eta hau gehitu du: “bere proiektuaren alde egin zuen apustu irmoari esker egiten du aurrera euskal gizarteak oro har”.

Confebaskek Euskadiko enpresa kopuruaren bilakaerari buruz landu duen azken txostenean zehazten denez (ikusi hemen), urria hilabete positiboa izan da, irailean baino 176 enpresa gehiago erregistratu baitira. Urriko hilabete baterako hazkunde zifrarik onena da 2016az geroztik. Aitzitik, alde batera utzita aurreko hilabetearekin alderatuta dagoen igoera hori, oraindik pandemiaren aurretik baino mila enpresa gutxiago daude gutxi gorabehera. Zehazki, otsailean erregistratutakoekin alderatuta, Euskadin orduan baino 939 konpainia gutxiago ditugu, nahiz eta, hori bai, apirileko minimotik galdutako firmen %55 berreskuratu dira. Urriaren 30ean, Euskadin guztira 57.954 enpresa zeuden Gizarte Segurantzan inskribatuta.

Confebasken 4.0 Industriari eta digitalizazioari buruzko Newsletter berrirako egindako adierazpenetan (ikusi hemen), SPRIko zuzendari nagusi izendatu berriak, Aitor Urzelaik, errepasoa egin du enpresen eraldaketa digitalerako eta 4.0 Industria esaten zaionaren sustapenerako martxan jarritako programa ugarien inguruan, baita orain arte horiek izan duten harreraren inguruan. Eta, ildo horretan Urzelaik adierazi duenez, “pandemia hainbat sektore eta enpresaren inbertsioa eta merkatuen dinamismoa moteltzen ari bada ere, zehazki digitalizazioaz eta 4.0 industriaz hitz egiten badugu, nik esango nuke bizitzea egokitu zaigun egoera hau prozesu horiek bizkortzen ari dela, batzuetan halabeharrez, eta beste batzuetan sortu den aukera baliatuz. Baina errealitatea da kasu askotan aurreikusitako epeak eta denborak nabarmen aurreratzen ari direla”.

Iñigo Urkullu lehendakariak Confebaskeko Batzorde Exekutiboaren ordezkaritza bat hartu du gaur goizean Lehendakaritzan, kideak izanik Eduardo Zubiaurre presidentea, Eduardo Aretxaga zuzendari nagusia eta erakunde kideetako presidenteak, Adegi - Eduardo Junkera -, Cebek - Iñaki Garcinuño - eta Sea Empresas Alavesas - Pascal Gomez -. Topaketan, Confebaskeko ordezkaritzak Euskadiren gaur egungo koiuntura ekonomikoa eta enpresariala laburtu dio lehendakariari, oso baldintzatua Covid-19aren krisiagatik. Edonola ere, gaur egungo egoera gorabehera, Confebaskeko presidente Eduardo Zubiaurrek beste mezu bat ere helarazi nahi izan dio lehendakariari, hau da, “itxaropen mezua, euskal enpresarien artean konbentzituta gaudelako egoera hau ere gaindituko dugula.