Noticias

Confebaskek Euskadiko enpresa kopuruaren bilakaerari buruz atera duen azken newsletterrean zehazten denez, maiatzean, martxotik apirilera bitartean galdutako euskal enpresa sarearen zati bat berreskuratu da. Zehazki, Gizarte Segurantzan izena emandako enpresen kopurua 623 enpresarekin hazi zen deskonfinamendua hasi ondoren. Maiatz baterako daturik onena da. Edonola ere, 2019ko maiatzarekin alderatuta, murrizketa 1.997 enpresakoa da, oraindik %3,4 gutxiago. Eta, maiatzean susperraldi garrantzitsu bat egon den arren, pandemiako hiru hilabeteetako datu metatuan 1.484 enpresa desegin dira, totalaren %2,5.

El Economista egunkarian argitaratutako elkarrizketa batean, Confebaskeko lehendakari Eduardo Zubiaurrek azpimarratu du beharrezkoa dela ERTEak luzatzea, milaka enpresa eta enplegu salbatzeko: “Erteak malgutzea eta luzatzea da modu bakarra enpresek zabalik jarraitzeko, eta gutxieneko jarduera eta enplegua mantentzeko. Euskadik Erteak behar ditu, horiek osatzeko moduan dago. Laguntzak osatu daitezke, kotizazio sozialak ordaindu, eta abar, Alemania egiten ari den bezala. Horrela, 2021ean susperraldi globalerako prest egongo gara”. Ildo horretan, Zubiaurrek gogorarazi duenez, “enpresak eta enplegua salbatzeko herrialde moduan hartu beharko dugun zor handiari aurre egiteko, jokaleku orekatu bat aurkeztu dugu, eusteko eta ondoren ekonomia berraktibatzeko; horrek zorpetzea ahalbidetuko digu eta, ondoren, zentzuzko epe batean, kontu saneatuak berreskuratzea, berriro ere prest egoteko, etorkizunean antzeko neurriak hartu behar badira”.

Hainbat komunikabidetan emandako elkarrizketetan, Confebaskeko lehendakari Eduardo Zubiaurrek agerian jarri ditu euskal ekonomiaren eta, oro har, gizartearen indarguneak Covid-19ak eragindako krisiari aurre egiteko. Euskal ekonomiaren indarguneen artean aipatu ditu industria sektorea eta esportazioa, baita ere “egonkortasun instituzionala, ‘diru publikoaren’ egoera saneatua edo Kontzertu Ekonomikoa bezalako tresnak”, horiei esker Euskadiren bereziasunei egokitutako zerga politika bat diseinatu daitekeelako. “Mantendu egin behar ditugu enpresak, pertsonak, ongizate gizartearen zerbitzuak, etab. Eta, horretarako, administazioak zorpetu egin beharko dira. Zorra – zentzuzkoa eta arrazoitua – zentzuz itzuli beharko da gero, tarteka, eta etorkizuneko belaunaldiak hipotekatu gabe. Hor kokatzen da gure proposamena”.

Confebask Euskadiko enpresa sarearen bilakaerari buruz atera duen azken Newsletterrean zehazten denez, apirilak espero zena erakutsi du, eta serie historiko osoko hilabete horretarako daturik makurrenak erregistratu ditu, Gizarte Segurantzan inskribatutako euskal enpresen kopurua 2001eko antzeko zifretan utzita. Autonomoen jaitsiera ere oso handia izan da, martxokoa baino handiagoa, 2002tik egoen mailarik baxuenean kokatuta. Zifra zehatzei erreparatuta, apirilean orain dela urtebete baino 2.309 enpresa gutxiago erregistratu ziren Euskadin, hau da, urtearteko jaitsiera -%3,9koa izan da, serie osoko urtearteko jaitsiera erritmorik handiena. Gizarte Segurantzan guztira inskribatutako enpresen kopurua 58.786an geratu da, erregistrorik baxuena izanik 2001az geroztik.

 Confebaskeko Batzorde Exekutiboak Eusko Jaurlaritzari proposatzen diona da aldi baterako zerga errekargu bat, finalista, denbora tarte jakin baterako, krisitik ateratzeko nahitaez hartu beharko den zorra itzuli ahal izateko. Zerga errekarguaren irismen, zenbateko eta epe zehatzak zehaztea faltako litzateke. Proposamen horiek badute aurrekaririk bai Euskadin bertan, bai Europako beste herrialde batzuetan, esaterako, Alemanian.