Tamara Yague Confebaskeko presidenteak prentsaurrekoa eman du erakundearen urteko Kontseilu Nagusia elkartu ondoren, euskal enpresak kezkatzen dituzten gaiez duen iritzia jakinarazteko. Bere hitzaldian, urte honetarako BPGaren hazkunde aurreikuspena %2 inguruan mantentzen dela nabarmendu du, baita dauden milioi bat kotizatzaileei eusteko adina enplegu sortuko dela ere. Aitzitik, hainbat arrisku faktore aipatu ditu, euskal enpresa sarearen lehiakortasuna eta jasangarritasuna mehatxatzen dituztenak. Ildo horretan, Tamara Yaguek industria sektorearen ahulezia gero eta handiagoaz ohartarazi du, zerbitzuen eta eraikuntzaren dinamismoarekin alderatuta. “Muga zergen gerra eta Europako batasun falta eragin negatiboa izaten ari diragure enpresa industrialetan”, adierazi du.

Confebaskeko azken newsletterrean deskribatzen denez, ekainean Gizarte Segurantzan izena emana zuten euskal enpresen kopurua 57.117 zen guztira, iazko hilabete berdinean baino 742 gutxiago. Urte arteko -%1,3ko jaitsiera da, ekainerako ohi baino beherakada handiagoa. Sektoreka, iazko ekainarekin alderatuta, jaitsiera Industria eta Zerbitzuetan izan da, eta Eraikuntzan, berriz, enpresa kopurua zertxobait hazi da. 2020ko otsailarekin alderatuta (pandemiaren aurretik), Industrian gertatu da jaitsierarik handiena (-%7,6 eta 503 enpresa gutxiago), eta ondoren Zerbitzuak daude (-%3 eta 1.370 enpresa gutxiago). Aitzitik, Eraikuntzan orduan baino 92 enpresa gehiago erregistratu dira (+%1,8). Bestalde, Euskadin urte arteko jaitsiera (-%1,3) estatuan erregistratutakoa baino handiagoa da, estatuan ere enpresa kopurua jaitsi den arren, baina neurri txikiagoan (-%0,4).

Maiatzean Gizarte Segurantzan izena emanda zuten euskal enpresen kopurua 57.882 izan zen. Apirilean baino 441 gehiago dira, maiatzerako ohikoa baino hazkunde handiagoarekin, baina hala ere aurreko urteko hilabete berdinean baino 69 gutxiago dira oraindik (-%0,1). 2020ko otsailarekin alderatuta ere (pandemiaren hasiera), arrakala ez da ixten. Maiatzaren 31n orduan baino 1.011 enpresa gutxiago zeuden oraindik (-%1,7), eta pandemian galdutako enpresen erdiak baino pixka bat gehiago berreskuratu dira (%52). Azken urteko bilakaerari dagokionez, euskal enpresen kopurua jaitsi egin zen Industrian, Zerbitzuetan mantendu zen eta Eraikuntzan hazi.

Confebasken azken txostenean nabarmentzen denez, Gizarte Segurantzan inskribatutako euskal enpresen kopurua 57.329 izan zen martxoan. Hau da, aurreko hilean baino 81 gehiago, baina iazko martxoan erregistratutakoak baino ia %1 gutxiago. Konkurtsoan dauden enpresen kopuruari dagokionez, azken datuek (2024ko itxiera) adierazten dute, oro har, iaz 289 enpresari eragin ziela, hau da, 2023an baino %29 gehiago. Martxoan Euskadin erregistratutako konpainien kopuruaren bilakaerara itzuliz, sektoreka eta urte arteko terminoetan, Industriakoak eta Zerbitzuetakoak jaitsi egin dira, eta Eraikuntzakoak, berriz, igo.

“Euskal enpresak Euskadiko garapen ekonomikoaren motorra dira, baina sortzen duten inpaktua aberastasuna eta enplegua sortzetik harago doa. Beren jardueraren bidez, gizarte ongizatea eta Euskadi berritzaileago, jasangarriago eta inklusiboago bat eraikitzea bultzatzen dute”. Euskal ogasunei egiten dieten ekarpen fiskala 12.000 milioi euro ingurukoa da urtean, hau da, Eusko Jaurlaritzaren gastu sozialaren aurrekontuaren %94. Hori da PwCk Confebaskentzat “Euskal enpresek Euskadiren aurrerabideari eta ongizate sozialari egindako ekarpena” izenburupean egindako azterketaren ondorio nagusia da, zeina gaur goizean aurkeztu baita komunikabideen aurrean.