“Euskal enpresak Euskadiko garapen ekonomikoaren motorra dira, baina sortzen duten inpaktua aberastasuna eta enplegua sortzetik harago doa. Beren jardueraren bidez, gizarte ongizatea eta Euskadi berritzaileago, jasangarriago eta inklusiboago bat eraikitzea bultzatzen dute”. Euskal ogasunei egiten dieten ekarpen fiskala 12.000 milioi euro ingurukoa da urtean, hau da, Eusko Jaurlaritzaren gastu sozialaren aurrekontuaren %94. Hori da PwCk Confebaskentzat “Euskal enpresek Euskadiren aurrerabideari eta ongizate sozialari egindako ekarpena” izenburupean egindako azterketaren ondorio nagusia da, zeina gaur goizean aurkeztu baita komunikabideen aurrean.

Lanbide Heziketaren arloan Hezkuntza Sailarekin duen lankidetza esparruaren barruan, Confebaskek Euskadiko Lanbide Heziketa Dual berriko nobedadeei buruzko gida berri bat aurkeztu du, enpresei zuzendua, zeinean 2024-2025 azken ikasturtetik lege esparru berria indarrean sartu zenetik egindako aldaketak zehazten diren, modu arin eta errazean. Ikasturte honetatik aurrera, Lantokiko Prestakuntzako (LP) derrigorrezko praktikak desagertzearekin batera, prestakuntza zikloetako ikasle guztiek modalitate dualean egingo dituzte ikasketak. Bi modalitate ezartzen dira: orokorra edo trinkoa, iraupenaren, espezializazio mailaren eta ikaslearen eta enpresaren arteko harremanaren arabera.

Asier Aloria Confebaskeko Prestakuntza, Talentu eta Enplegu saileko zuzendaria eta Carlos Pereda Enplegu arduraduna Enpleguaren aldeko Itun Sozialari atxikitzeko sinaduraren lehen urteurreneko ekitaldian izan dira gaur goizean. Testuinguru horretan, Carlos Pereda Confebaskeko Enplegu arduradunak gogorarazi duenez, “garai berriak lan eskaintzaren eta eskariaren arteko desoreka sortzen ari dira. Eta itun hau herrialdearen erronka handi horri erantzun kolektiboa emateko bide gisa planteatzen da”. Horrez gain, Peredak gogoratu duenez, “itun honek beste lurralde batzuetako talentua erakartzeko eta integratzeko estrategiak ezartzearen alde ere egiten du, erregularizatzeko eta tituluak homologatzeko prozesuak bizkortuz, enplegurako aukerak bultzatzeko”.

Azken hilabetean Euskadik 3.391 afiliatu berri gehitu ditu, iazko hil berean baino mila gutxiago. Guztira, joan den hilabete amaieran 1.017.897 afiliatu zeuden Gizarte Segurantzan. Halaber, otsailean langabezia 908 pertsonatan murriztu da, eta Lanbideko bulegoetan guztira 108.453 langabe erregistratu dira. Datu hauen harira, Confebaskeko Ekonomia arduradunak, Pablo Martínek, adierazi duenez, “epe luzeko langabeziari eta kualifikazio baxua duten langabeei irtenbidea emateko, funtsezko faktorea prestakuntza da. Beharrezkoak dira enpresen beharrei egokitutako prestakuntza-politikak, horrela pertsona horien lan-merkatuan sartzeko aukerak areagotzeko”.

Confebask-eko lehendakaria, Tamara Yague, gonbidatua izan da gaur goizean Euskal Finantza Aliantzaren eraketa ekitaldira, Imanol Pradales lehendakariak aurkeztu duen ekimenera. Lehendakariak iragarri du bere Gobernuak dagoeneko abiatu dituela izapideak Euskal Finantza Institutua 1.000M€-ko finantza-gaitasun gehigarriaz hornitzeko. “Gure helburua da 1.000M€-ko inbertsio publiko horrek gutxienez beste 3.000 milioi euroko kapital eta aurrezki pribatuak mobilizatzea, egungo legegintzaldian guztira 4.000 milioi euroko finantza-potentziala lortzeko.” Confebask-ek ekimen hau modu positiboan baloratu du, eta azpimarratu du “bide onean” dagoela.