Confebaskek eta bere elkarte kideek - Adegi, Cebek eta Sea -, Eusko Jaurlaritzarekin eta Euskadiko LHko ikastetxeekin lankidetzan, kanpaina berri bat abiarazi dute Euskadiko LH dualera enpresak erakartzeko, ikasleak enpresak edo sektoreak behar dituen gaitasun zehatzetan prestatzeko eta, gainera, gazteei lan aukera zabala eskaintzeko. 3.000 euskal enpresa eta Lanbide Heziketako ikastetxeetako 4.000 ikasle inguruk dagoeneko hartu dute parte programan, indarrean daraman 6 urteetan. Ikasturte honetan bakarrik (2017/2018), ia 2.000 gazte ari dira LH duala egiten 1.000 enpresa baino gehiagotan, hau da, hamar aldiz baino gehiago biderkatu da firma parte hartzaileen eta ikasleen kopurua, 2012. urtean programa abiarazi zenetik.

Orain, Elkarrizketa Sozialaren Mahaia denon ahotan dabilelarik, ez dago gaizki gogoratzea foro horretan erabaki genuela enpresa elkarte guztiek, Eusko Jaurlaritzak eta sindikatuek deklarazio instituzional garrantzi bat egitea, Euskadiko Diru Sarrerak Bermatzeko Errentari buruz, eztabaida zabal eta bizi baten ondoren. Izan ere, Confebaskek orduan jada bazioen egun mantentzen dugun zerbait: erabateko baietza euskal DSBEari. Beste kontu bat da nola kudeatzen dugun eta zer xederekin.

Euskadiko enpresa sarearen bilakaerari buruz Confebaskek apirileko datuekin atera berri duen Newsletterrean erakusten denez, 2018ko lehen hiru hilabeteetan hartzekodunen konkurtsoan sartu diren euskal enpresen kopurua %17’8 txikiagoa da iazko aldi berdinarekin alderatuta, hau da, lehendabiziko jaitsiera da, bederatzi hilabetez etengabe igotzen aritu eta gero. Sektoreka, konkurtsatutako enpresak batez ere Industrian murriztu dira (-%50), eta ondoren daude Eraikuntzakoak (-%23,1) eta Zerbitzuetakoak (-%2’5). Euskadin Gizarte Segurantzan erregistratutako enpresa kopuruari eta autonomoen kopuruari dagokienez, berriz, apirilean apenas egon den mugimendurik, esan baitaiteke bi aldagaiak ia geldirik daudela orain dela urte bateko zifrekin alderatuta.

Confebask beka deialdi berri bat abiarazi du EHU/UPV, Deustuko Unibertsitate eta Mondragon Unibertsitateko ikasle unibertsitario edo titulatu berrientzat, 2018ko ekainetik aurrera Erasmus+ programaren baitan Europako enpresa batean egonaldi praktikoa egin nahi badute. Deialdian interesa duten gradu edo masterreko ikasleek eta/edo tituludun berriek datorren ekainaren 1era arte bidali ahal izango dute eskaria. Hautaketa prozesu baten ondoren, azkenean aukeratu dituztenek udan hasiko dituzte praktikak Erresuma Batuko enpresetan.

Joan asteburuan Europa Pressek zabaldutako elkarrizketa batean Confebaskeko presidente Roberto Larrañagak gogorarazi duenez, Eusko Jaurlaritzarekin sinatu berri den 2018-2020 Enpleguaren eta Kualifikazioaren aldeko Hitzarmenak “euskal enpresek dugun premiazko behar bati” erantzun nahi dio , “epe labur eta ertainera pertsonak lortzeko, kopuruari zein kualifikazioari dagokienez”. “Hemen – gehitu du Roberto Larrañagak –, garrantzitsuena da langabezian dagoen oro enplegatu ahal izatea, eta hori ezin da formen menpe jarri, horixe delako auziaren mamia”.