CEV Valentziako patronalak azterketa bat aurkeztu die gaur goizean Confebaski eta Bilboko Portuko Agintaritzari, “Merkantzien garraioaren eskari potentziala Korridore Kantauriar- Mediterraneoan” izenburupean, aipatu tren azpiegitura hobetzeko inbertsioak bultzatzeko asmoarekin. Topaketan parte hartu dute, azterketa egin duen etxeaz gain, CEV Valentziako patronalaren lehendakari Salvador Navarrok, Confebaskeko Roberto Larrañagak, bertako zuzendari nagusi Eduardo Aretxagak; eta SEA-Arabako Enpresarien idazkari nagusi Juan Ugartek.

Basauriko (Bizkaia) Bidebieta Lanbide Heziketako Ikastetxe Integratuak ekitaldi bat egin du gaur bere 50. urteurrena ospatzeko; 1967an sortu zen, antzinako “Basconia Aprendizen Eskola’-ren ordezko. Joan den mendearen erdialdean eskola hura desagertu zenean, Basauriko eta eskualdeko 80 enpresa inguruk prestakuntza eskola berri bat martxan jartzeko eskatu zuten, kualifikazio profesional handiagoko pertsonak behar zituztelako. Hainbat urtez negoziatu ondoren, 1967an, Industria Ofizialtza eta Maisutza Eskola sortu zen azkenean, inguruko sare produktiboaren beharrari erantzuteko helburuarekin: gaur egungo Bidebieta LHII bultzatzeko, inplikatuta zeuden enpresek zentroaren hasierako kostuaren %40 jarri zuten orduan, antzinako pezeten 2 milioi baino gehiago.

Duela 5 urte martxan jarri zenetik, Lanbide Heziketa dualeko euskal ereduak hamar bider handitu du Euskadin parte hartzen duten enpresen kopurua, baita ikasleena ere; horrenbestez, 2017-2018 ikasturte honetan 1.000 euskal enpresak baino gehiagok LHko formatu dualeko 2.000 ikasle hartuko dituzte, hau da, Euskadin urtero graduatzen diren ikasle guztien %20 inguru. Eredu duala gurean hartzen ari den garrantzi gero eta handiagoaz ohartuta, Confebask, ADEGI, CEBEK eta SEAk enpresako trebatzailearen prestakuntza bereziari heldu diote, LHko ikastetxeko tutorearekin batera, funtsezkoa delako Euskadiko lanbide heziketaren arrakastarako, zehazki eredu dualari dagokionez.

INEk egin berri dituen estatistikak Euskadi jartzen dute erkidego autonomoen artean lehen postuan batez besteko soldatei dagokienez, –Madrilen batez bestekoaren gainetik–, eta 2018 - 2015 adian eskulanaren prezioa gehien igo den erkidego autonomoa ere bada. Lehenengo estatistikak INEk landutako Biztanleria Aktiboaren Inkesta (BAI) hartzen du erreferentziatzat, 2016ko abenduaren erreferentziarekin, neurtutako azken urtea hori baita. Bigarren estatistikari dagokionez, hori ere INEk egindakoa izanik, lanaren prezioen indizea aztertzen du (LPI); urtero egiten den txostena da, eta bere helburua da eskulanaren prezioak denboran duen aldaketa neurtzea, soilik lan merkatuaren presioak kontuan hartuta, hau da, prezio horri ez diote eragiten egindako lanaren kalitateak edo kantitateak.

Confebaskek, ADEGI, CEBEK eta SEA bere hiru erakunde fundatzaileekin batera, eta Osalanen babesarekin, hainbat egitasmo abiarazi ditu lanpostuetan laneko arriskuen eta osasunaren prebentzio politika indartzeko asmoarekin. Helburua da laneko arriskuen prebentzioa ez dadila ikusi derrigor bete beharreko arau eta baldintzen bilduma huts moduan. Asmoa da, Confebaskeko Amaia Lopez Iriondoren hitzetan, ”laneko arriskuen prebentzioa kontzeptu samur moduan ikustea, enpresan erraz aplikatzekoa, eta pertsonengana zuzenduta”. Aurreikusitako egitasmoen artean, gaiari buruzko webgune berezi baten sorrera dago: SEGURMANIA - http://www.segurmaniazurekin.eus -