Hainbat komunikabidetan egindako adierazpenetan, Confebaskeko arlo juridiko-laboraleko zuzendari Virginia Mugicak ziurtatu du “gaur ministro kontseiluan onartu dena 2017an denok sinatu genuena” dela. Mugikak gogorarazi duenez, lanbide arteko akordio hori “bi printzipiotan oinarrituta garatu zen: legezkotasuna eta egokitasuna”. Eta gehiago zehaztu du: “Euskadin estatu mailako hitzarmenak aurrera egiten ari zirela ikusita, 2017an negoziazio kolektiboko gure egitura babesteko erabaki partekatua hartu zen, hamarkadetan eraikiz joan zena. Eta, horretarako – jarraitzen du Virginia Mugicak – tresna juridiko guztiz legezko eta egoki bat erabiltzen dugu: lanbide arteko akordio bat, gure hitzarmen guztiei aplikatzeko lehentasuna ematen ziena, eta Euskadin ordezkaritza handiena duten erakunde guztiek sinatu zutena”.

Confebaskeko kide Adegi, Cebek eta Seak euskal enpresei egindako inkesten arabera, “hamarretik zortzik diote zailtasunak dituztela behar dituzten pertsonak kontratatzeko. Eta hamarkada honetan, gaur egungo langileen %25 inguruk erretiroa hartuko dute – 240.000 lagun”. Panorama hori dela eta, Confebaskeko zuzendari nagusiak gogorarazi du “Euskadik enplegurako immigrazio estrategia bat beharko duela, negu demografiko hau gainditzen laguntzeko eta, horrela, gure enpresen lehiakortasuna eta horrekin batera egungo oparotasun eta ongizate mailak mantendu ahal izateko. Gure enpresa erakundeak – Confebask, Adegi, Cebek eta Sea – dagoeneko ekintzara pasatzen ari gara. Enpresen ia erdiak, %40 inguru, Euskaditik kanpoko pertsonak kontratatzea planteatzen ari dira beren beharrak asetzeko”.

Confebaskek azken buletinean jasotzen denez, Euskadin Gizarte Segurantzan erregistratutako enpresen kopurua 26 murriztu zen apirilean, 2020tik apirilerako izandako zifrarik txarrena. 2023ko apirilean zeudenekin alderatuta, zifra are txikiagoa da: 306 enpresa gutxiago (-%0,5). Guztira, joan den hilabetearen amaieran 57.809 enpresa zeuden erregistratuta Euskadin. Halaber, konkurtsoan dauden EAEko enpresen kopurua 86ra igo zen 2024ko lehen hiruhilekoan, 2023ko lehen hiruhilekoan baino %126,3 gehiago, hazkunde hori estatuan erregistratutakoa baino handiagoa izanik, non igoera %67,3koa izan baitzen. Sektoreka, urteko lehen hiruhilekoan, konkurtsoan sartutako enpresen kopurua nabarmen hazi zen sektore guztietan, eta igoerarik handiena eraikuntzan izan da (+%300 eta 16 enpresa konkurtsopean), eta ondoren zerbitzuetan (+%120 eta 55 enpresa konkurtsopean) eta industrian (+%66,7 eta 15 enpresa konkurtsopean).

Confebaskeko Prestakuntza, Talentu eta Enplegu departamentuak Erasmus+ beken deialdi berri bat abiarazi du EHU, Deustuko Unibertsitate eta Mondragon Unibertsitateko ikasle unibertsitario edo titulatu berrientzat, 2024 uztailetik aurrera Europako enpresa batean egonaldi praktikoa egin nahi badute. Azken bi hamarkadetan, 4.000 gaztek baino gehiagok egin dituzte praktikak atzerrian Confebaskek kudeatzen duen Erasmus+ programaren barruan, EBren finantzaketari esker, SEPIEren (Hezkuntza Nazioartekotzeko Espainiako Zerbitzua) eta Bizkaiko Foru Aldundiaren bidez. Deialdian interesa duten gradu edo masterreko ikasle unibertsitarioek datorren maiatzaren 21era arte bidali ahal izango dute eskaria.

Euskal enpresek 44.250 lanpostu bete beharko dituzte 2024an. EAEko enpresen %70ek kontratazio motaren bat egitea aurreikusten dute, batez ere jarduera maila handiagoa izango dela aurreikusten delako. Eta plantillari dagokionez, euskal enpresen %13k soilik aurreikusten dute hori murriztea. Gainerakoek, berriz, handitu edo berdin mantenduko dute. Euskal enpresak unibertsitateko graduetarako eta Lanbide Heziketako zikloetarako erreserbatu du aurreikusitako kontratazioaren %80. Euskal enpresen %70ek kontratazioren bat egitea aurreikusten dute. %80ko maximora igo dira kontratatzeko zailtasunak dituztela adierazten duten enpresak. Confebaskek EAEko enpresen Enplegu Beharrei eta Kualifikazioari buruzko V. Inkesta egin du, Adegi, Cebek eta Sea erakundeekin lankidetzan. Inkestaren bidez enpresek lan merkatua eta horren beharrak hobeto ezagutzeko ekarpena egitea nahi da.